كان المرحوم جدي رحمه الله عايش معنا بالبيت وكانت بَركات وجودو معنا وتسامحو وأخلاقو وزهدو ... ثروة أنا شخصيا ما عرفت قيمتها لبعد ما توفى بسبب أنو توفى وانا في مقتبل الشباب وقبل نضوج العقل .. وكان نظرو وسمعو خفيفين ... وكل ما قعدت معو ينصحني بالمحبة وخاصة للناس اللي بيكرهوني .... وبذكر كان يتلفظ بعبارات ما لقيتها غريبة لبعد ما كبرت وعجزت عن تنفيذ بعض منها ... يعني مثلا كان يقول بحزن عن حدا كان يلاقي منو بغض وإساءة ( ياااا عيني هوّي ... ما بيعرف غير هيك ) وإذا شي مرة حدا خبّروا أنو فلان عم يحكي عنك كلام مو لائق .. كان تاني يوم يروح لعندو .. يزورو وياخدلو ولو ظرف قهوة او علبة متة هدية ويشرب عندو كاسة متة ويرجع .... وكتير أحيان كان يقول إلي شخصيا ( الله سبحانه وتعالى أنعم عليي بضعف النظر والسمع .. وهيك ما بشوف اللي بيزدريني ولا بسمع اللي بيسب عليي ) وأكتر من هيك كان يوصينا ( ولك جدي .. إذا شي مرة رحتو ع كرم العنب والتين تبعكن ولقيتو حدا غريب طالع ع الشجرة وعم يحوّش .. عملوا حالكن ما شفتوه .. وطلعو من الكرم تيخلّص حواش .. حرام مشان لا تحرجوه ... يا عيني هوي بيكون بحاجة ) هيك عاش العمر رحمة عليه وعلى أمواتكن .... اللي بدي قولو أنو الغريب فينا نحنا البشر .. أنو بس نقرر نتخاصم منتخاصم بجرأة وبلا تردد وبقرار سريع .. وبس بدنا نتصالح منخجل من بعضنا كتير وبدنا ألف مقدمة وتجهيز وواسطة حتى يتم الأمر ! يا ترى ليش الأشيا الغلط واللي ضد إرادة الطبيعة والأخلاق سهلة نعملا ؟؟؟! والأشيا الصح واللي بترضي الله والقيم النبيلة صعبة علينا ومنهكل هما ؟؟؟! ليش ؟ فعلا نحنا البشر مخلوقات غريبة جدا ! معقول خلقنا هيك ؟! الظاهر آلاف السنين اللي مرّت ع البشرية غيّرتنا فعلا ... و علّمتنا شكل آخر للكرامة وعزة النفس غير الشكل الحقيقي والصحيح

عمار يوسف محمد